Wings for Life World Run: საქართველოში, უკვე მეორედ!

3 მაისს, კახეთში, ლოპოტის გადასახვევიდან კავკასიონის ქედის გაყოლებით, უკვე მეორედ გაიმართა ყველაზე მასშტაბური საქველმოქმედო სპორტული ღონისძიება Wings for Life World Run, რომელშიც საქართველოდან 5 ათასი ადამიანი მონაწილეობდა, მათ შორის 600-ზე მეტი უცხოელი 35 ქვეყნიდან!

წლევანდელი რბენა, რომლის მხარდამჭერი სპორტისა და ახალგაზრდობის საქმეთა სამინისტრო გახლდათ (თბილისის მერიასთან ერთად), ვაჟთა შორის შარშანდელმა გამარჯვებულმა, ლაგოდეხელმა ალექსანდრე ოლეინიკოვმა მოიგო – მან 57,39 კილომეტრი დაფარა, ქალთა შორის კი პირველი ნიდერლანდელი სტუმარი, ლინდა ვან ფლიტი გახლდათ – 32,01კმ.

„გამარჯვებას ლაგოდეხელებს, მეგობრებს, დღევანდელი რბენის მონაწილეებს და მამაჩემის ხსოვნას ვუძღვნი“! – განაცხადა ალექსანდრე ოლეინიკოვმა.

კვირას მან 5 კილომეტრით გააუმჯობესა შარშანდელი შედეგი. შეგახსენებთ, რომ მსოფლიო რბენის გამარჯვებულებს (ვაჟი და გოგონა) უფლება აქვთ თავად აირჩიონ ის ქვეყანა, სადაც ერთი წლის შემდეგ ირბენენ. ნიდერლანდელი ლინდა ვან ფლიტი სწორედ ამ უფლებით ეწვია საქართველოს.

Wings for Life World Run-ის უნიკალურობა ისაა, რომ არაა განსაზღვრული ტრასის მანძილი და დრო. სხვანაირად რომ ვთქვათ, არ არსებობს ფინიშის ხაზი. ტრადიციული ფინიშის ნაცვლად მოძრაობს ეგრეთ წოდებული „ფინიშ მანქანა“, რომელიც სტარტიდან 30 წუთში იწყებს სვლას და წინასწარ დადგენილი სიჩქარით 15კმ/სთ-ით მოძრაობს, გარკვეული მანძილის შემდეგ სიჩქარე 20, შემდეგ კი 25 კმ/სთ-მდე იზრდება. როგორც კი „ფინიშ მანქანა“ მორბენალს გადაუსწრებს, მისი დრო ფიქსირდება და ის ავტომატურად ეთიშება შეჯიბრს.

საქართველოში, კახეთში გამართულ რბენაზე რეგისტრაცია Wings for Life World Run-ის ოფიციალურ ვებ-გვერდზე მიმდინარეობდა 26 აპრილის ჩათვლით, თუმცა ლიმიტის ამოწურვის გამო – 5000 – რეგისტრაცია რბენამდე 12 დღით ადრე შეწყდა. რეგისტრაციის საფასური 20 ლარი იყო. ცნობისათვის: შარშან, მსოფლიო რბენის შედეგად, საქართველოდან Wings for Life World Run-ის ერთიან ფონდში 100 ათასი ლარი გადაირიცხა – 60 ათასი რეგისტრაციიდან და 40 ათასი – სპონსორინგიდან, ხოლო მსოფლიოს ყველა რბენიდან სრულიად 3 მილიონი ევრო შევიდა. ამ თანხით სხვადასხვა კვლევები დაფინანსდება.

რბენის შემდეგ კონცერტი გაიმართა Zurkin-ის, Moku Moku-ს, The Jetbird-ის, LOUDspeakers-ის, Green Room feat. Dato Lomidze-ს და ყველას მონაწილეობით.

ლაშა გოდუაძე (www.msy.gov.ge; 2015 წლის 4 მაისი)
ფოტო: www.msy.gov.ge