ალფრედო დი სტეფანო: 20 ფაქტი

დღეს 4 ივლისია, ყველა დროის ერთ-ერთი საუკეთესო მოთამაშის ალფრედო დი სტეფანოს დაბადების დღე.
მადრიდის რეალის სიმბოლოზე აჭარასპორტი 20 საინტერესო ფაქტს შემოგთავაზებთ.

1: ალფრედო დი სტეფანოს წინაპრები იტალიიდან გადასახლდნენ არგენტინაში. ლეგენდარული ფეხბურთელის ბებია, დედის დედა, ირლანდიელი გახლდათ.

2: პატარაობაში ალფრედო ბუენოს აირესის რივერ პლეიტს გულშემატკივრობდა, მიუხედავად იმისა, რომ ბოკაში ცხოვრობდა.

3: დი სტეფანოს პირველი კლუბი ბუენოს აირესის ბავშვთა გუნდი ლოს კარდალესი იყო. 12 წლისამ სწორედ იქ დაიწყო თამაში.

4: რივერ პლეიტში 16 წლისა მივიდა – მამის მეგობარმა, კლუბის ხელმძღვანელებთან დაახლოებულმა ალეხანდრო ლუსარჩიმ ბიჭი გასასინჯად წაიყვანა და მანაც იმდენად კარგად ითამაშა, რომ აიყვანეს.

5: 1944 წლის 7 მარტს ალფრედო დი სტეფანომ პირველად ითამაშა რივერ პლეიტის შემადგენლობაში არგენტინის პირველობაზე – ურაკანთან მატჩის დასრულებამდე 20 წუთით ადრე შეცვლაზე შევიდა.

6: 1946 წელს ალფრედო ურაკანში გაანათხოვრეს. ამ კლუბში იმ წელს სხვადასხვა ტურნირზე 45 მატჩში 29 გოლი გაიტანა და ბუენოსაირესელებმაც უმალ უკან დაიბრუნეს.

7: 1947 წელი დი სტეფანოს კარიერაში პირველი ოქროს წელიწადია: რივერ პლეიტის შემადგენლობაში მეორედ იგებს არგენტინის ჩემპიონატს, 27 გოლით პირველობის საუკეთესო ბომბარდირი ხდება, არგენტინის ნაკრების მაისურით სამხრეთ ამერიკის ჩემპიონატში იმარჯვებს და ტურნირის საუკეთესო მოთამაშედ ასახელებენ.

8: 1947 წლის 4 დეკემბერს ფორვარდი პირველად თამაშობს არგენტინის ნაკრებში: სამხრეთ ამერიკის ჩემპიონატში ბოლივიასთან 7:0 მოგებულ მატჩში. 62ე წუთზე ალფრედომ ნაკრებში პირველი, მატჩში კი რიგით მე6 გოლი გაიტანა.

9: 1949-53 წლებში ალფრედო დი სტეფანო კოლუმბიაში, ბოგოტას მილიონარიოსის შემადგენლობაში თამაშობს. ამ კლუბის მაისურით ყველა ტურნირზე 292 მატჩი ჩაატარა და 269 გოლი გაიტანა.

10: 1957 წლის 30 იანვარს დი სტეფანომ პირველად ითამაშა ესპანეთის ნაკრების შემადგენლობაში: პირენეელებმა მადრიდში შვეიცარიელებს 5:1 სძლიეს. ალფრედომ ჰეთ-თრიქი შეასრულა.

11: 1953-64 წლებში თავდამსხმელმა სამეფო კლუბის მაისური 510 ოფიციალურ მატჩში მოირგო და 418 გოლი გაიტანა. ამ წლების მანძილზე ალფრედომ 17 გუნდური ტიტული მოიგო!

12: დი სტეფანოს მიერ რეალში დამყარებული უამრავი რეკორდი კრიშტიანუ რონალდუმ გააუმობესა.

13: 1994 წელს ალფრედო დი სტეფანო ფიფას პრეზიდენტის სპციალური პრიზით დაჯილდოვდა, 2010 წლის 18 თებერვალს კი უეფას პრეზიდენტის სპეციალური პრემიით.

14: 1957 და 1959 წლებში დი სტეფანო ფრანს ფუტბოლმა ევროპის საუკეთესო ფეხბურთელად დაასახელა და ოქროს ბურთი გადასცა. 1989 წელს ფრანგულმა გამოცემამ ფორვარდი შესანიშნავი კარიერისთვის სპეციალური ოქროს ბურთით დააჯილდოვა.

15: 1963 წლის 23 ოქტომბერს, ინგლისის ფეხბურთის ასოციაციის საუკუნოვანი იუბილე აღინიშნა ლონდონში, უემბლიზე: ინგლისმა მსოფლიოს ნაკრებს 2:1 სძლია. ალფრედო დი სტეფანო ვარსკვლავთა გუნდის კაპიტანი გახლდათ.

16: ესპანეთის ჩემპიონატში ჩატარებულ 329 მატჩში დი სტეფანომ 228 გოლი გაიტანა. პრიმერადივიზიონის ისტორიაში ეს მაჩვენებელი მეხუთეა ლეო მესის, კრიშტიანუ რონალდუს, ტელმო სარას და უგო სანჩესის შემდეგ.

17: 2000 წლის 5 ნოემბერს ალფრედო დი სტეფანო მადრიდის რეალის საპატიო პრეზიდენტად აირჩიეს.

18: 2003 წლის ნოემბერში, უეფას 50 წლის იუბილესთან დაკავშირებით, ევროპის ყველა ქვეყანამ ბოლო 50 წლის საუკეთესო ფეხბურთელი დაასახელა. ესპანეთის ფეხბურთის ფედერაციამ ასეთად ალფრედო დი სტეფანო აღიარა.

19: 2006 წლის 9 მაისს იმ სარბიელს, სადაც მადრიდის რეალი ვარჯიშობს, ალფრედო დი სტეფანოს სახელი მიენიჭა. ამ და ჩემპიონთა თასის პირველად მოგების 50 წლის იუბილესთან დაკავშირებით, რეალი ამხანაგურ შეხვედრაში საფრანგეთის სტად დე რეიმსს გაეჯიბრა. რეალმა ანტონიო კასანოს (2), რობერტო სოლდადოს (2), სერხიო რამოსის და ხოსე მანუელ ხურადოს გოლებით 6:1 მოიგო.

20: რაოდენ უცნაურიც უნდა იყოს, ყველა დროის ერთ-ერთ საუკეთესო ფეხბურთელს არასდროს უთამაშია მსოფლიო ჩემპიონატებზე.

ლაშა გოდუაძე (www.adjarasport.com; 2019 წლის 4 ივლისი)