ბათუმი 2018: „მილიონი სვლა“ საერთაშორისო ასპარეზზე!

25 მაისს, 15 საათზე, ნონა გაფრინდაშვილის სახელობის თბილისის ჭადრაკის სასახლეში „მილიონის სვლის“ ფარგლებში პირველი საერთაშორისო მატჩი გაიმართა ონლაინჭადრაკში: ტოკიო – თბილისი.

ტოკიოდან პირველ სვლა გააკეთა ქართველმა სუმოისტმა ტოჩინოშინმა (ლევან გორგაძე). მას საპასუხო სვლით უპასუხეს ევროპის საჭადრაკო კავშირის პრეზიდენტმა ზურაბ აზმაიფარაშვილმა და საქართველოს ჭადრაკის ფედერაციის პრეზიდენტმა გია გიორგაძემ.

თბილისიდან ტოკიოში მყოფ ქართველ სუმოისტს მიესალმნენ ზურაბ აზმაიფარაშვილი და გია გიორგაძე, რომლებმაც მაისის ბაშოზე ყველაზე მნიშვნელოვანი ბრძოლის მოგება კულტურისა და სპორტის მინისტრის მიხეილ გიორგაძის და თბილისის მერის კახი კალაძის სახელითაც მიულოცეს. ამას გარდა, 2018 წლის მსოფლიო საჭადრაკო ოლიმპიადის ორგანიზატორებმა ტოჩინოშინი საპატიო სტუმრის სტატუსით 43-ე საჭადრაკო ოლიმპიადაზეც მიიწვიეს.

„მილიონი სვლის“ ფარგლებში 10 მაისს საქართველოს პრეზიდენტმა გიორგი მარგველაშვილმა პირველი სვლა ქართველი გმირის, გიორგი ანწუხელიძის ვაჟის, ლევან ანწუხელიძის პირისპირ გააკეთა, ხოლო 13 მაისს ბათუმის მერი ლაშა კომახიძე ლეგენდარული დინამოს ფეხბურთელებს – ალექსანდრე ჩივაძეს, თენგიზ სულაქველიძესა და ოთარ გაბელიას დაუპირისპირდა.

პროექტი „მილიონი სვლა“ (იდეის ავტორები: ევროპის საჭადრაკო კავშირის პრეზიდენტი ზურაბ აზმაიფარაშვილი და კვლევისა და განვითარების ასოციაციის დირექტორი ალექსანდრე სულავა) ქართული ინოვაციაა, რომელიც, უპირველესად, ჭადრაკისა და საქართველოს პოპულარიზაციას ემსახურება.

პროექტის ბოლო სვლები გაკეთდება 43-ე მსოფლიო საჭადრაკო ოლიმპიადის დაწყებამდე, რომელსაც ბათუმი, 23 სექტემბრიდან 6 ოქტომბრამდე უმასპინძლებს.

ლაშა გოდუაძე (www.batumi2018.fide.com/ge; 2018 წლის 25 მაისი)
ფოტო: ბათუმი 2018-ის პრესცენტრი