ლაშა ტალახაძეს და ძალოსნებს სპორტის სამინისტროში უმასპინძლეს

სპორტისა და ახალგაზრდობის საქმეთა მინისტრმა ტარიელ ხეჩიკაშვილმა ევროპის ჩემპიონ ლაშა ტალახაძეს, ძალოსნობის ფედერაციის ხელმძღვანელებს და ასაკობრივი ნაკრების წევრებს და მწვრთნელებს უმასპინძლა. შეხვედრას სპორტისა და ახალგაზრდობის საქმეთა მინისტრის მოადგილე შალვა გოგოლაძე და სამინისტროს თანამშრომლები დაესწრნენ.

ლაშა ტალახაძემ რამდენიმე დღის წინ მეორედ მოიგო ევროპის ჩემპიონის ტიტული. ხორვატიის ქალაქ სპლიტში ლაშამ მსოფლიო რეკორდიც დაამყარა ატაცში – მან 217 კილოგრამი დაძლია და ირანელი ბეჰდად სალიმის შარშანდელი მიღწევა კილოგრამით გააუმჯობესა.

„ჩემთვის ეს გამარჯვება ძალიან მნიშვნელოვანია. ცხადია გახარებული ვარ, რადგან მორიგ მიზანს მივაღწიე, თუმცა ვხვდები, რომ წინ არაერთი გამოწვევა მელის და ვეცდები სხვა ამოცანებიც დადებითად გადავჭრა. რაც შეეხება მსოფლიო რეკორდს, მიხარია, რომ ასეთი წონა დავძლიე. მსურს მადლობა გადავუხადო ყველა გულშემატკივარს, რადგან ჩემპიონატის განმავლობაში მათ მხარდაჭერას მუდმივად ვგრძნობდი. ასევე მადლობა მწვრთნელებს, ფედერაციის ხელმძღვანელობას და, რა თქმა უნდა, სპორტისა და ახალგაზრდობის საქმეთა სამინისტროს, პირადად ბატონ მინისტრს ყურადღებისა და მხარდაჭერისთვის“, – განაცხადა ოლიმპიურმა, მსოფლიოს და ევროპის 2-გზის ჩემპიონმა ლაშა ტალახაძემ.

„დღევანდელ შეხვედრაზე ქართული ძალოსნობის არაერთი მნიშვნელოვანი საკითხი განვიხილეთ. მათ შორის ინფრასტრუქტურის გაუმჯობესება, დარბაზების კეთილმოწყობა, სპორტსმენთა შეკრებები… რაც შეეხება ლაშას წარმატებას, ის უდავოდ გამორჩეულია და ყველასგან მაქსიმალურ ყურადღებას და დაფასებას იმსახურებს. ძალოსნობის ფედერაციას დიდი გეგმები აქვს და ვეცდებით სამინისტროს და კერძო სექტორის დახმარებით, ყველა დასახულ მიზანს მივაღწიოთ“, – განაცხადა ძალოსნობის ფედერაციის პრეზიდენტმა, 3-გზის ოლიმპიურმა ჩემპიონმა კახი კახიაშვილმა.

ხორვატიაში გამართულ ევროპირველობაზე მძიმეწონოსანთა შორის ტალახაძესთან ერთად ასპარეზობდა რიოს ოლიმპიადის ბრინჯაოს პრიზიორი ირაკლი თურმანიძე. მან პირველი მოძრაობის შემდეგ ფეხის ტრავმა მიიღო, ასპარეზობა ვერ გააგრძელა და შეუფასებელი დარჩა. ატაცში ირაკლიმ 201კგ დაძლია, რაც III შედეგი გახლდათ. მძიმეწონოსან გოგონათა შორის უნდა გამოსულიყო ანასტასია გოტფრიდიც, თუმცა შეჯიბრის წინა დღეს, ვარჯიშზე მიღებული ტრავმის გამო მან ფიცარნაგზე გასვლა ვერ მოახერხა.

ლაშა ტალახაძე მე-4 ქართველი ძალოსანია, რომელმაც ერთზე მეტჯერ მოიგო ევროპის ჩემპიონის ტიტული. რეკორდსმენია ჰელსინკის ოლიმპიადის ჩემპიონი რაფაელ ჩიმიშკიანი – 6 ტრიუმფი. ლაშას და ეროვნული ნაკრების მწვრთნელის გიორგი ასანიძის აქტივში ევროპაზე მოგებული 3 ოქროა, ძალოსნობის ფედერაციის პრეზიდენტმა, 3-გზის ოლიმპიურმა ჩემპიონმა კახი კახიაშვილმა კი საქართველოს სახელით 2-ჯერ მოიპოვა ევროპული ოქრო.

წელს ლაშას მსოფლიოს ჩემპიონის ტიტულის დაცვაც მოუწევს. 2015 წელს ქართველმა ძალოსანმა ამერიკის ქალაქ ჰიუსტონში გაიმარჯვა. პლანეტის უძლიერესი მამაკაცი წლეულს კვლავ ამერიკაში, ქალაქ ანაჰაიმში გამოვლინდება. მსოფლიო ჩემპიონატი 28 ნოემბერს დაიწყება და 5 დეკემბერს დასრულდება.

რაც შეეხება ახალგაზრდულ ნაკრებს: ბანგკოკში გამართულ 17-წლამდელ ძალოსანთა მსოფლიოს ჩემპიონატზე საქართველოს ნაკრებმა ზაფხულის III ახალგაზრდული ოლიმპიური ფესტივალის ერთი ლიცენზია მოიპოვა. გუნდურ ჩათვლაში ჩვენი ნაკრები XV ადგილზე გავიდა, რაც ავტომატურად ნიშნავს ერთ ლიცენზიას. III ახალგაზრდული ოლიმპიური ფესტივალი 2018 წლის 6-18 ოქტომბერს ბუენოს აირესში გაიმართება.

ლაშა გოდუაძე (www.msy.gov.ge; 2017 წლის 12 აპრილი)