ლეოს 20 ზღაპარი

პოლონეთსა და უკრაინაში მიმდინარე ევროპის ჩემპიონატმა გულშემატკივრებს ახლახანს დასრულებული საკლუბო სეზონი უცბად მიავიწყა: ყველა სანაკრებო პაექრობებს ადევნებს თვალს.
არაერთი საინტერესო კითხვა დაისვა: ვინ გახდება ევროპის ჩემპიონი? შეძლებს ესპანეთი 4 წლის წინ მოგებული ტიტულის შენარჩუნებას? რამდენად მზადაა ინგლისი ევრომწვერვალზე ასასვლელად?
ამ და სხვა კითხვებზე ნელ-ნელა გვიპასუხებენ, მანამდე კი ის ვთქვათ, რაც დანამდვილებით ვიცით: მსოფლიოს საუკეთესო ფეხბურთელმა ლეო მესიმ 2011-12 წლების სეზონში 20 რეკორდი მიითვალა! 24 წლის ბიჭისთვის ეს ზღაპრული შედეგია!

1 – ლეო მესი პირველია, ვინც ერთ სეზონში 6 სხვადასხვა ტურნირში შეძლო გოლის გატანა და საგოლე გადაცემის შესრულება.

2 – 29 საგოლე პასი სეზონში ბარსას ათიანის ახალი პირადი რეკორდია.

3 – 24 წლის მესი ყველაზე ახალგაზრდაა, ვინც პრიმერადივიზიონში 150-გოლიან ნიშნულს გადააჭარბა!

4 – ჩემპიონატში ლეომ ზედიზედ 6 საშინაო მატჩში შეძლო გოლის გატანა და თან, ასეთი სერია 2-ჯერ მიითვალა. ესეც პირადი რეკორდია.

5 – მესიმ მარტინსის (1942-43) და რონალდოს (1996-97) საკლუბო რეკორდები გაიმეორა – ჩემპიონატის მიჯრით 10 მატჩში გაიტანა.

6 – ლა ლიგაში ბარსას ყველაზე სწრაფი ჰეთ-თრიქი ახლა არგენტინელს ეკუთვნის. მაიორკასთან 5:0 მოგებულ თამაშში მან 3 გოლი 17 წუთში შეაგდო!

7 – 2011-12 წლების ჩემპიონატში კატალონიელთა ლიდერმა 10 პენალტი გაიტანა. არგენტინელმა ნიდერლანდელი რონალდ კუმანის საკლუბო რეკორდი გაიმეორა.

8 – ბარსას მაისურით პრიმერადივიზიონის ბომბარდირის წოდება 2-ჯერ მხოლოდ კინიმ და მესიმ მოიგეს. ეგაა მხოლოდ, რომ კინიმ 2 საუკეთესო სეზონში საერთო ჯამში უფრო ნაკლები გაიტანა, ვიდრე ლეომ ახლახანს დასრულებულ ჩემპიონატში.

9 – მესიმ სამუელ ეტოოს საკლუბო რეკორდი გაიმეორა – ჩემპიონატში ზედიზედ 7 გასვლით მატჩში გაიტანა.

10 – სამხრეთამერიკელმა გენიოსმა ბარსას მაისურით ლა ლიგაში უკვე 214 მატჩი ჩაატარა. ამდენი შეხვედრა ჩემპიონატში ლეგიონერთაგან არავის უთამაშია.

11 – განვლილ სეზონში მსოფლიოს საუკეთესო ფეხბურთელმა 60 ოფიციალური შეხვედრა ჩაატარა. ესეც პირადი რეკორდია.

12 – ზედიზედ მე-4 სეზონია მესის ყველა ტურნირში 35-ზე მეტი გოლი გააქვს. წლების წინ ასეთი უხვგოლიანი სერია მხოლოდ რეალის მექსიკელ გოლეადორ უგო სანჩესს ჰქონდა.

13 – ლეომ განვლილ ჩემპიონატში 8 ჰეთ-თრიქი მიითვალა. ეს ტურნირის რეკორდია.

14 – არგენტინელს ლა ლიგაში უკვე 14 ჰეთ-თრიქი დაუგროვდა. ამ მხრივ ის ბარსას ისტორიაში უკონკურენტოა.

15 – მესიმ ზედიზედ მეოთხედ მოიგო ჩემპიონთა ლიგის საუკეთესო ბომბარდირის ტიტული. ესეც არნახული შედეგია!

16 – ჩემპიონთა ლიგის განვლილ სეზონში ლეომ 7 საგარეო თამაშში გაიტანა. აქამდე ასეთი რამ მხოლოდ ერნან კრესპომ, იარი ლიტმანენმა და ტიერი ანრიმ მოახერხეს.

17 – უშუალოდ ჩემპიონთა ლიგაში გატანილი 14 გოლი ტურნირის ახალი რეკორდია.

18 – 24 წლის ლეო ყველაზე ახალგაზრდაა, ვინც ჩემპიონთა ლიგაში 50-გოლიან ნიშნულს გადაცდა.

19 – ლევერკუზენის ბაიერს არგენტინელმა ერთ მატჩში 5 გოლი გაუტანა. ევროპის ყველაზე პრესტიჟულ საკლუბო ტურნირში ასეთი შედეგით ვერავინ დაიკვეხნის.

20 – განვლილ სეზონში შეგდებული 73 ბურთით, რაც არათუ კლუბის, ევროპის რეკორდია, მესი ბარსელონის ყველა დროის საუკეთესო ბომბარდირი გახდა – 232 გოლის გამტან სესარს გადაასწრო. არგენტინელის ანგარიშზე ახლა 253 გოლია.

ლაშა გოდუაძე (ჟურნალი ტაბულა; 2012 წლის 18-24 ივნისი)