მაისურები და მილიონები

საფეხბურთო გრანდების ბიუჯეტი რამდენიმე ასეული მილიონი ევროთი განისაზღვრება, კარგი მენეჯმენტის წყალობით კი კლუბები ფინანსური წლის ბოლოს საბანკო ანგარიშებს კიდევ უფრო ზრდიან.
წამყვან ლიგებში გუნდს შემოსავლის უამრავი წყარო აქვს: მატჩების სატელევიზიო უფლებების გაყიდვით დაწყებული საკლუბო ჟურნალის და ოფიციალური სამატჩო პროგრამის გამოცემით დასრულებული.
მაგალითად, მანჩესტერ იუნაიტედი საკლუბო ჟურნალს ჩინელი გულშემატკივრებისთვისაც გამოსცემს, მისი ტირაჟი კი თითქმის 3 მილიონს უტოლდება! და თუ გავითვალისწინებთ, რომ ერთი ჟურნალის ფასი დაახლოებით 6 ინგლისური გირვანქაა, თავად მიხვდებით ერთ თვეში მხოლოდ ჩინეთში გაყიდული საკლუბო ჟურნალით კლუბს რამხელა შემოსავალი აქვს.

ფეხბურთი მხოლოდ სპორტი რომ აღარაა, ეს ყველამ დიდი ხანია იცის. ცხადია, ტრანსკონტინენტალურმა კომპანიებმაც. და ამიტომაცაა, რომ ისინი ფეხბურთში ფულის დაბანდებას ცდილობენ. მეგაკომპანიებს საუკეთესო პირობები სურთ, ფეხბურთში საუკეთესო რეკლამა კი დასახელების ან ლოგოს მაისურზე გამოსახვაა – ამ უფლებას კლუბები სარფიანად ყიდიან.

საუკეთესო ათეულს ტურინის იუვენტუსი ხნის: იტალიელებს ფრანგულ BetClicთან 2012 წლის ჩათვლით აქვთ გაფორმებული კონტრაქტი და სანაცვლოდ წელიწადში 6,7 მილიონ გირვანქას იღებენ.

მე9 ადგილზეა მანჩესტერ სიტი: არაბთა გაერთიანებული საამიროების ეროვნული ავიაკომპანია Etihad Airways 2009 წლიდან სეზონში 7,5 მილიონ გირვანქას იხდის და საკლუბო ცისფერ მაისურსაც მისი სახელწოდება ამშვენებს.

იტალიის ჩემპიონატის ლიდერი მილანი, რომლის სატიტულო სპონსორი მეორე არაბული ავიაკომოპანია Fly Emiratesია, სეზონში 9,8 მილიონს იღებს. სილვიო ბერლუსკონის გუნდმა შარშან გააფორმა 5წლიანი ხელშეკრულება.

მე7 ადგილზეა ჩელსი: ლონდონური კლუბის მაისურს მე5 სეზონია კორეული Samsungის დასახელება ამშვენებს. კონტრაქტი, რომლის მიხედვითაც ჩელსი სეზონში 10 მილიონ გირვანქას იღებს, ივნისში იწურება.

ლონდონის კიდევ ერთმა კლუბმა ტოტენჰემ ჰოთსფურმა ერთბაშად 2 კომპანიასთან გააფორმა ხელშეკრულება: პრემიერლიგაში მაისურს Autonomyის ლოგო ამშვენებს, ჩემპიონთა ლიგასა და სათასო ტურნირებში კი Investec. რაც შეეხება შემოსავალს, ის სეზონში 12,5 მილიონი გირვანქაა.

მე5 ადგილზე მადრიდის რეალია. სამეფო კლუბის წინა სპონსორის BenQის გაკოტრების შემდეგ ხელმძღვანელობამ საბუქმეიქერო კომპანია BWinთან 2013 წლის ივლისამდე გააფორმა კონტრაქტი. სანაცვლოდ გუნდის საბანკო ანგარიში ყოველ სეზონში 16,8 მილიონი გირვანქით შეივსება.

ჩემპიონთა თასის 5გზის მფლობელ ლივერპულს ბოლო ორი ათწლეულის მანძილზე დანიური ლუდსახარშის Carlsbergის ლოგო ამშვენებდა, თუმცა 2009 წელს გაფორმებული კონტრაქტით, ენფილდროუდელთა მაისურს Standard Chartered Bankის სახელწოდება ამშვენებს. შემოსავალი? 19,9 მილიონი გირვანქა სეზონში!

საუკეთესო სამეულს მსოფლიოს ყველაზე ძვირადღირებული კლუბი მანჩესტერ იუნაიტედი ხსნის: ოლდტრაფორდელთა მესვეურებმა ზაფხულში კომპანია AONთან 4-წლიანი კონტრაქტი გააფორმეს, სანაცვლოდ კი 80 მილიონ გირვანქას მიიღებენ.

მიუნხენის ბაიერნი მეორეა: ევროპის ერთ-ერთი უდიდესი მობილური კავშირგაბმულობის კომპანია Deutsche Telekom ნოემბერში გაფორმებული შეთანხმებით კლუბს 2013 წლის ივლისამდე 71 მილიონ გირვანქას გადაურიცხავს.

და ბარსელონა?

პრეზიდენტმა სანდრო როსელმა საკლუბო ტრადიცია დაარღვია – მაისურზე პირველად გაჩნდება რეკლამა! კატარის მეცნიერების და განათლების განვითარების არაკომერციული ფონდის Qatar Foundationის ლოგო მომავალი სეზონიდან 5 წლით დაამშვენებს მაისურს, თითო სეზონში კი ბარსელონა 25 მილიონ გირვანქას მიიღებს!

ლაშა გოდუაძე (ჟურნალი ტაბულა; 2012 წლის 11 სექტემბერი)

ka_GEGeorgian