მინსკი 2019: სოფელი მზადაა

ევროპის II თამაშების მონაწილეთათვის განკუთვნილი ათლეტთა სოფლის სამშენებლო სამუშაოები თითქმის დასრულდა.

ბელარუსის სახელმწიფო უნივერსიტეტის საერთო საცხოვრებლის კომპლექსი 9 შენობისგან შედგება და 9 800-ზე მეტ ადამიანზეა გათვლილი. უშუალოდ შეჯიბრის დღეებში იქ ოფიციალური სპორტული დელეგაციები – დაახლოებით 6 ათასამდე სტუმარი – განთავსდებიან.

სპორტსმენთა და მათი თანმხლები პირებისთვის განკუთვნილი სოფელი აეროპორტიდან ნახევარი საათის სავალზეა. ყველა სპორტული არენაც იქვეა, ხოლო ყველაზე შორს ტყვიის მსროლელთა ცენტრია და იქ მისასვლელად დაახლოებით 35-40 წუთია საჭირო.

მზად არის სასადილოც, რომელსაც შეუძლია ერთბაშად მოემსახუროს 2 ათასამდე ადამიანს. ასევე ცნობილია, რომ სპორტსმენთა სოფელში დაახლოებით 700 მოხალისე იმუშავებს.

13 მაისიდან კომპლექსის ტერიტორიაზე გარეშე პირთა შესვლა შეიზღუდება, 15 ივნისიდან კი პირველ სტუმრებს ელიან.

ლაშა გოდუაძე (www.adjarasport.com; 2019 წლის 14 მაისი)