სპორტის რაინდის საპატიო წოდება ვახტანგ და ნინო სალუქვაძეებს

სპორტისა და ახალგაზრდობის საქმეთა მინისტრმა ტარიელ ხეჩიკაშვილმა დღეს სპორტის რაინდის საპატიო წოდებით და სპეციალური მედლით დააჯილდოვა ტყვიის  სროლაში ოლიმპიური ჩემპიონი ნინო სალუქვაძე და მისი მწვრთნელი ვახტანგ სალუქვაძე. საზეიმო ცერემონიას სამინისტროში განთავსებულმა ქართული სპორტის მუზეუმმა უმასპინძლა.

ნინო სალუქვაძემ ოლიმპიური ჩემპიონის ტიტული სპორტული პისტოლეტით სროლაში 1988 წელს, სეულში მოიგო. სეულშივე პნევმატურით ვერცხლის მედალი მოიპოვა. 20 წლის შემდეგ, 2008 წელს, პეკინში ნინომ პნევმატური პისტოლეტით ბრინჯაოს მედალიც მოიგო. ნინო სალუქვაძე პირველი და ერთადერთი ქართველი სპორტსმენია, რომელმაც ოლიმპიური თამაშების სამივე სინჯის მედალი მოიპოვა!

„ჩემთვის დიდი პატივია, რომ დღეს ქალბატონ ნინოს და ბატონ ვახტანგს ვაჯილდოებთ. მსურს მივულოცო მამა-შვილს ეს აღიარება – ქალბატონმა ნინომ ოლიმპიური ჩემპიონის წოდება მამის, ბატონი ვახტანგის ხელმძღვანელობით მოიპოვა, რაც, დამეთანხმებით, გამორჩეული ფაქტია. ნინო სალუქვაძე რიო დე ჟანეიროში თავის მე-8 ოლიმპიადაზე იასპარეზებს და მინდა აქედანვე წარმატება და გამარჯვება ვუსურვო. აქვე ვისარგებლებ შემთხვევით და ბატონ ვახტანგს 85 წლის იუბილეს ვულოცავ, დიდხანს სიცოცხლეს და ჯანმრთელობას ვუსურვებ“! – განაცხადა ტარიელ ხეჩიკაშვილმა.

„მსურს მამაის სახელითაც დიდი მადლობა გადაგიხადოთ. ჩემთვის და მამასთვის ეს დიდი აღიარებაა! დღევანდელი დღე ბატონ ვახტანგს სიურპრიზად დავუტოვეთ – არ იცოდა, რომ ესოდენ საპატიო ჯილდო უნდა მიეღო. ვეცდები რიო დე ჟანეიროში, ოლიმპიურ თამაშებზე საქართველო და ჩემი გულშემატკივრები მედლით გავახარო. უღრმესი მადლობა სპორტის სამინისტროს, პირადად ბატონ ტარიელს ამ დაფასებისთვის“, – განაცხადა ქალბატონმა ნინომ.

ნინო სალუქვაძემ ტყვიის სროლაში ვარჯიში მამის, ბატონი ვახტანგის ხელმძღვანელობით დაიწყო და ყველა დიდ წარმატებას მისი შემწეობით მიაღწია: პირად და გუნდურ პირველობაში 7-ჯერ მოიგო მსოფლიოს ჩემპიონის ტიტული, 9-ჯერ – მსოფლიოს სუპერთასი, 5-ჯერ – ევროპის ჩემპიონატი…

1998 და 1999 წლებში ნინო სალუქვაძე საქართველოს წლის საუკეთესო სპორტსმენად დასახელდა. დაჯილდოებულია ვახტანგ გორგასლის II და III ხარისხის ორდენებით.

ნინო სალუქვაძემ უკვე მოიპოვა რიო დე ჟანეიროს ოლიმპიური თამაშების ლიცენზია. რიო 2016 მისთვის მე-8 ოლიმპიადა იქნება! აქვე შეგახსენებთ, რომ თანამედროვე ოლიმპიადების ისტორიაში ანუ 1896 წლიდან, 8 ოლიმპიადაზე მხოლოდ 6 სპორტსმენს უასპარეზია.

ვახტანგ და ნინო სალუქვაძეების დაჯილდოების ცერემონიას სამინისტროს მესვეურები, ეროვნული ოლიმპიური კომიტეტის ვიცე-პრეზიდენტი ელგუჯა ბერიშვილი, 3-გზის ოლიმპიური ჩემპიონი, ძალოსნობის ფედერაციის პრეზიდენტი კახი კახიაშვილი, ჟურნალისტები და გულემატკივრები დაესწრნენ.

ლაშა გოდუაძე (www.msy.gov.ge; 2016 წლის 4 თებერვალი)
ფოტო: www.msy.gov.ge